Էդուարդ Թադևոսի Կարապետյան

 Երկարատև հիվանդությունից հետո , 82 տարեկան հասակում կյանքից հեռացավ Հայաստանում թոքային վիրաբուժության հիմնադիրներից, Հայաստանի վիրաբուժական ակադեմիայի, Նյու Յորքի բժշկական ակադեմիայի իսկական անդամ, դոկտոր պրոֆեսոր Էդուարդ Թադևոսի Կարապետյանը:

Էդուարդ Կարապետյանը ծնվել է 1931թ. հունվարի 1-ին Սևան քաղաքում ծառայողի ընտանիքում: Ավարտելով Երևանի պետական բժշկական ինստիտուտն աշխատել է Հրազդանի, Դիլիջանի շրջանային հիվանդանոցներում, հետագայում հրավիրվել է կազմակերպելու և ղեկավարելու Հանրապետական հակատուբերկուլոզային դիսպանսերի բազայի վրա հիմնված թոքային վիրաբուժության բաժանմունքը: Պաշտպանելով թեկնածուական և դոկտորական ատենախոսությունները 1972-1994թ.թ. ղեկավարել է Երևանի պետական բժշկական համալսարանի տուբերկուլոզի ամբիոնը,1994-2012թ.թ.Ա.Լ.Միքայելյանի անվան վիրաբուժության ինստիտուտի կրծքային վիրաբուժության բաժանմունքը:

Նրա ավելի քան 150 գիտական աշխատությունները, մենագրությունները և նորարությունները վերաբերում են թոքային ախտաբանության ախտորոշման և վիրահատական բուժման հարցերին:

Է.Թ.Կարապետյանն իր մասնագիտական գործնեությանն զուգընթաց տարբեր ժամանակներ վարել է ՀՀ ֆթիզիատրների գիտական ընկերության նախագահի, ՀՀ առողջապահության նախարարության գլխավոր ֆթիզիատրի, «Սբ.Ներսես Մեծ» Շնորհալու անվ. բժշկական կենտրոնի Հոգաբարձուների Խորհրդի անդամի պարտականությունները:

Է.Թ.Կարապետյանը իր գործընկերների և բարեկամների հիշողության մեջ կմնա որպես վառ անհատականության տեր անձնավորություն, բարձրակարգ բժիշկ, գիտնական, ով իր ամբողջ կյանքն անմնացորդ նվիրեց մարդկանց առողջությանը ծառայելու գործին:

Հարցեր, պատասխաններ, մեկնաբանություններ